إسلام الشاملي
في زمن السوشيال ميديا بقى الترند حلم سريع ضغطة زر فيديو غريب لقطة مثيرة وفجأة الاسم في كل حتة المشكلة إن كتير من الشباب خلطوا بين الشهرة والقيمة وبين إنك تكون معروف وإنك تكون مؤثر بجد
هوس الترند خلّى بعض الناس مستعدة تعمل أي حاجة عشان تتشاف استفزاز إساءة تمثيل أو حتى تشويه صورتها بنفسها المهم الترند يطلع وبعدها؟ ولا حاجة يومين ويختفي ويبدأ سباق جديد على حاجة أغرب وأعلى صوتًا
هنا بييجي جنون العظمة أول ما فيديو ينجح أو اسم ينتشر الإحساس يكبر
أنا جامد أنا فاهم أنا مؤثر
ومع شوية تعليقات وتصفيق الواحد يصدق الوهم وينسى إن النجاح الحقيقي مش لحظة ده مسار
الترند مش إنجاز واللايكات مش مقياس رجولة ولا وعي ولا قيمة في شباب بتتعب سنين في شغلها علمها تطوعها ومحدش يعرف اسمها لكنها بتبني نفسها وبلدها بهدوء وفي المقابل ناس بتطلع فجأة وتختفي أسرع ما طلعت
الخطير إن هوس الترند بيقتل الصبر ويخليك عايز كل حاجة بسرعة نجاح سريع فلوس سريعة شهرة سريعة من غير تعب ولا تعلم ولا نضج وده طريق نهايته معروفة
لو انت شاب اسأل نفسك
هو أنا عايز أبقى تريند؟
ولا عايز أبقى شخص له قيمة؟
الترند يروح وييجي
إنما اللي يبقى هو اللي اشتغل على نفسه
وطوّر عقله
وعمل أثر حقيقي في حياته وحياة اللي حواليه
خليك فاكر
مش كل مشهور ناجح
ومش كل ناجح مشهور
لكن كل شخص حقيقي قيمته أكبر من أي ترند
