بقلم : محمد المؤيد
ف الوقت اللى الناس طالع عين أبوها من الأسعار المولعه
واللى كل يوم بتزيد أكتر من اليوم اللى قبله
واللى خلت الرجالة والستات عمالين يجروا ورا لقمة العيش لدرجة إنهم مش شايفين بعض أصلا
يعنى لا الستات فاضية تعلق على كرش رجالتهم ولا الرجاله فاضية تعلق على حواجب ستاتهم
وف وسط السباق اللى محدش عارف نهاية أمته ولا هيخلص على ايه ولا حتى هيخلص ازاى
فجأة ومن غير أى مقدمات ولا صفارة إنذار
ظهر لنا على السوشيال ميديا ناس قاعدة ومركزة وواخده بالها من كل كبيرة وصغيرة بتحصل فى البلد
لدرجة انهم واخدين بالهم قوى
مش بس من حواجب ستاتهم ولا كرش رجالتهم
لأ ده كمان واخدين بالهم قوى من حواجب الفنانة منى زكى
اللى يادوب البرومو بتاع مسلسلها الجديد ” تحت الوصاية ” اللى هيتذاع فى رمضان نزل من هنا
ولقينا إنفجار في مواقع التواصل ” الجِماعى ” آسف اقصد الاجتماعى
وهوب
الحق حواجب منى زكى
منى زكى تشوه شكل المرأة المسلمة
منى زكى تسيء إلى المجتمع المصرى
ده حتى فى ناس قالت إن حواجب منى زكى هى السبب الخفى اللى ورا الحرب بين روسيا وأوكرانيا بس طبعا امريكا متعرفش
وفعلا وبجد مش هزار حواجب منى كانت السبب فى حرب بس مش حرب روسيا وأوكرانيا
لا حرب ثانية أشد ضراوة وأكثر حدة
حرب المنجى منها الله بين اللى رافضين شكل الحواجب واللى مؤيدين شكل الحواجب
وقامت الدنيا
وهاتك يا إتهامات وشتيمة من الطرفين اللى يقول الجهل هيودينا لحد فين كفاية رجعية بقى
واللى يقول والله اللى بيحصل ده حرام ولازم المسلسل ده يتوقف لأنه عدو الدين
والناقد الكبير طلع أتكلم وقال كلنا معاكى يامنى لحد آخر شعرة فى حواجبك ورد عليه واحد من الناحية التانية احنا بقينا ف زمن البدع والضلال عمر دى ماكانت حواجبنا
وسابت الناس كل المصايب اللى بتحصل حواليهم ونسيت اسعار الفراخ البيضة ومشكلة القمح والحرب وحتى صور الناس فى زلزال سوريا وتركيا
وبقت حواجب الاستاذة منى زكى هى الترند رقم واحد على السوشيال ميديا
علشان تتحقق المقولة الاغريقية الفرعونية المكسيكية القديمة اللى بتقول
يابابا ازاى اتعلم الهيافة قاله تعالى فى الهايفة .. واتصدر
