من ديوان … في حب مصر

يا شاطرة ياللي ف

حبك بتجمعي الملايين

علما و أطبا و فلاسفة

و ولادك الفلاحين

واحد انا منهم

عايش بقالي سنين

مجنون بحب بلادي 

حب الرمال والطين

حب الصخور في الجبل 

حب الشجر و النيل

وناسك الطيبة ف الشدة لما تلين

و صلاة بأذان أو جرس

تدعي على المعتدين

وبنت بلدي العفيفة

وشباب يسر العين

عاشق كمان نسمتك

اللي بتشفي العليل

و الشمس ساعة الغروب

وقمر ملعلع بنوره 

واقف بيستنى دوره

و نجوم سماك اللي طاللة

ري العطاشى بقلة

دم الشهيد ف رمالك

و النصر كان يوم عيد

يا شاطرة ياللي ف حبك. بتجمعي الملايين

قلمي اللي بيكتب لوحده

شعرك حنين ف حنين

يا ضامة كل الأحبة

يا ضامة جوة الفؤاد

عرب و مصريين

يا سفيرة للإنسانية 

بتاريخ حضارة و دين

يا قبلة للأنبيا و مهد للمرسلين

يا جنود و غاوية شهادة

قضت حياتها عبادة

عايشين تمللي ف ريادة

و بتصنع المستحيل

يا شاطرة ياللي ف حبك  

بتجمعي الملايين 

بكرة اللي جاي بكراكي

مهما يقولنا فداكي

لازم نكون ويياكي

والذل للخاينين

بقلم الشاعر /حمادة الجندي