بقلم الشاعر/حمادة الجندي
ناوي على إيه دلوقت
أفكارك شاردة و مهموم
بتفكر طول الوقت
مش عارف ترسى على قرار
حياتك جد أو هزار
محتار بين فوق أو تحت
ناوي على إيه دلوقت
*****
خايف من بكرة أو إمبارح
في هزارك أسلوبك جارح
أعذارك حتى لو تقولها
في دقيقة بيبطل مفعولها
و بتنسى كلامك اللي قلته
و خلاص كدة كدة لبخت
ناوي على إيه دلوقت
*****
عايش في حياتك أوهام
بتصدق ، قالوا عنك كلام
حاسس إن العالم مضطهدك
متخيل كله بيتهمك
فـ كلام من تحت لتحت
ناوي على إيه دلوقت
*****
ليه شايل الدنيا على أكتافك
و شايفها بتلعن أسلافك
روق يا أخينا و عيش سنك
ما تبطل تحرق كده دمك
دي الدنيا بحالها و لا تساوي
شوف كام من عمرك ضيعت
ناوي على إيه دلوقت
*****
جربت تفك التكشيرة
تدي لأحزانك تأشيرة
تتصالح مع نفسك مرة
و تعدي الأيام المرة
ياما قبلك مريت و سبقت
قول ناوي على إيه دلوقت
*****
