عزيزي الزوج…… ♡

بقلم سعد محمد العباسي (باحث في العلوم الشرعية والإسلامية بجامعة الأزهر الشريف)

زوجتك المفروض تشوف نظرات الإعجاب في عينك وتسمع كلمات الحب والثناء منك.. مش تُفقدها ثقتها بنفسها بالنقد والتريقة على شكل جسمها ونوعية شعرها..

قال الرسول ﷺ “استَوْصوا بالنِّساءِ خيرًا فإنَّهنَّ عَوانٌ في أيديكُم” هي أسيرة في بيتك.. ملهاش أي مصدر للحب والحنان والمدح غير منك..

يا سيدي الفاضل منتظر إيه من زوجة ولدت قيصري!

جسمها ترهل؟! ده من آثار الرضاعة والفطام..

هي مش ذنبها إن انت مش بتغض بصرك بما فيه الكفاية..

شعرها لو مش عاجبك.. كلف واديها فلوس تصبغ وتعمل بروتين..

ده هي حتى عشان توفرلك قرش.. استخسرت تجيب لنفسها علبة فيتامينات تعوضها اللي فقدته في الحمل والرضاعة فشعرها تساقط وأسنانها وقعت..

ارحم زوجتك من المقارنات بالأقارب والبنات فالشارع أو حتى المذيعات .. والشخصيات اللي مش وراهم غير عمليات التجميل والباديكير..

يعني أقولها انتي قمر وأكذب؟! أه اكذب يا أخي.. دي الكذبة الوحيدة اللي مش حرام بل عليها أجر في الحديث “لم أسمَعْ رسولَ اللَّهِ يرخَّصُ في شيءٍ مِمَّا يقولُ النَّاسُ إنَّه كذِبٌ إلَّا في ثلاثٍ …..والرَّجُلُ يكذِبُ لامرأتِهِ”