بقلم/ الشاعر حمادة الجندي
سكوت يا صاحبي بتنقل كلام
عامل فيها صاحبي و راجل همام
تزورني و أزورك، يجرجرني زورك
تاخد مني كلمة تسافر أوام
بتاكل وتشرب وتحبس معايا
وألاقيك بتنهش لحمي فـ أفايا
مفهمني إنك أخويا وحبيبي
جنابك أساسا قليل الربايا
يفيدك بإيه قوللي نقل الكلام
هتقبض مهية ؟ ما تنطق بكام ؟
على كتفي عايز تبين ولاءك
وتكسب محبة و تعظيم سلام ؟
في وشي بتبقى أخويا وشقيقي
و لما بتمشي بتقطع طريقي
طب اسمع هقولك نهاية الكلام
من اليوم ورايح ماعندتش صديقي
لسانك حصانك فحاول تسيطر
ولو صنته صانك هيفضل معطر
فقبل ماتنطق بكلمة يا صاحبي
اعقل كلامك و حاول تفكر
اعقل كلامك و حاول تفكر
