بقلم سعد محمد العباسي
باحث في العلوم الشرعية والإسلامية بجامعة الأزهر الشريف..
……………….
س1️⃣/ هل صلاة الجمعة واجبة على النساء ولازم تصليها في المسجد؟
ج/ لا..
صلاة الجمعة واجبة على الرجال فقط
أما النساء ..مش واجب عليها صلاة جمعة
***
س2️⃣/ طيب صلاة الجمعة للبنات لو هتصليها في البيت بتكون ازاي ؟
ج/ بتكون صلاة ظهر عادية 4 ركعات …زي أي صلاة ظهر بتصليها باقي الأسبوع
***
س3️⃣/ هل ينفع أصلي الظهر يوم الجمعة والخطيب بيخطب خطبة الجمعة ؟
ج/اه ينفع تصلي الظهر وقت الخطبة
****
س4️⃣/ هل لازم اسمع خطبة الجمعة ؟؟
ج/ لا …مش لازم تسمعي الخطبة مش واجب عليكي بس لو عاوزه تسمعيها وتستفيدي براحتك
***
س5️⃣/ ينفع أسمع خطبة الجمعة في التلفزيون أو في الجامع اللي تحت البيت وأصلي ورا الإمام ؟
ج/ لا .. ماينفعش تصلي ورا الإمام خالص إلا لو انتي في المسجد
بس لو هتسمعي الخطبة للاستفادة براحتك
***
س6️⃣/ ينفع أصلي الظهر يوم الجمعة ركعتين ؟
ج/لا …ماينفعش
لازم ظهر 4 ركعات
****
س7️⃣/ طيب صلاة الظهر اللي هصليها يوم الجمعة ليها سنة ؟
ج/ايوة صلاة ظهر عادية زي أي صلاة ظهر في أي يوم تاني
بتصلي الظهر 4 ركعات
وصلي السنن بتاعته عادي جدًا (4 قبل الظهر و2 بعده )
*
س8️⃣/ طيب ينفع البنت تصلي الجمعة في المسجد ؟ ولو صلت وحضرت الخطبة في المسجد هتصلي 4 ركعات ولا ركعتين زي الرجال ؟
ج/ لو صلت في المسجد هينطبق عليها كل أحكام صلاة الجمعة للرجال؛
إنها لازم تسمع وتنصت وقت الخطبة وماتتكلمش خالص وكمان هتصلي ركعتين زي الرجال بالظبط
_______________________
