كلمات الشاعر/, حمادة الجندي
فى بلدى يا ناس بقابل ناس
بلا رحمة ولا شفقة
ولا حتى ضمير حساس
تقابل ناس بتضحكلك
تجاملك ولا تفرحلك
ومن جواها مش طايقة
تشوف اهلك
وناس بتمدلك إيدها
بكل حماس
ووقت الشدة بتجيلها
البعيد محتاس
وبرضه تمدلك إيدها
عشان تتباس
تساومك ع اللي محتاجه
ويعرف به جميع الناس
وناس وقفت ضد أطماع ناس
وطمعت بعدها فى الناس
وناس تاكل متشبعشى
وناس شاريه ما بتبعشى
وناس خيبة وناس خاينة
وناس عايشين على الإحسان
وناس خايفة
وناس عارفة
وناس شايفة ..
من الظالم ومن إنسان
فى ناس خالية
وناس عالية
وناس مالية البلاد بالناس
فى ناس بتموت
وناس بتعيش
وناس سافرت ولا بتجيش
فى ناس تاكل
وناس تتاكل
وناس عايشة
بحمل مشاكل
فى ناس طلعت
وناس نزلت
فى ناس ولعت
وناس غرقت
وناس سرقت بعدها وهربت
فى ناس باعت وناس اتباعت
فى ناس جاعت وناس ضاعت
فى ناس عايشين لكن أموات
وناس موتى وهم أحياء
فى ناس خبرة وناس دايماً بتتـــاخد لناس عبرة
فى ناس تبكى وتتباكى
وعنها الناس بتتحاكى
وناس فاهمة
وناس واهمة
وناس عامية
وبقت بامية
وناس مش طايقة ريحة الناس
وفى الأخر أنا مش عارف
أنا فين من جميع الناس
أقولها لكم ..
لقيت جوايا كل الناس
