بقلم حمادة الجندي
ليلة بحلم م الليالي
وكان ساعتها صباحها صوم
ودي حاجة مش جديدة
زي عادتي كل يوم
الخلاصة لقيت وليمة
سفرة تملى العين وقيمة
المحمر والمشمر
والمحاشي والكباب
قال وقاعد جنب أمي
وأختي واخدة ركن باب
المهم و قبل ما أنسى
قلت أحلي بالجاتوه
طعم مش زي اللي كلته
قبل سابق أو كلوه
كلمة منهم كلمة مني
حبتين جد فـ هزار
فجأة ألاقي الست حرمي
جاية جايبة لي الفطار
فول مدمس فول مسوس
قُصره فول كان زيته حار
لسة جاي يدوب هدوقه
رب ما يوريكوا نااار
قلت ياخسارة الكباب
قام قالت لي ياراجل اعقل
هو كان شاف لينا باب
قلت كان شايف لولاكي
جيتي طابة فوق نفوخي
آل كأن الفول هيهرب
ضاعت الأكلة الملوكي
لما يتحط المحمر!!
والمحاشي والمشمر !!
غير كباب الحلة والبيف والسجق
ألقى نفسي جوه حلم بدون ما أدوق
قالت الفول قوم هيبرد
قلت حاضر جاي يا ستي
يبدو أن الفول دا حالف
لم يفارق لينا بُق
هوَّ دا حلمي الليلادي
وأبقى أشوفكم لما أفوق
